බල්ලොත් එක්ක බෑ! I don't feed stray dogs - 02

කලින් ලිපිය වූ I do NOT feed STRAY DOGS!!!! X 7 කෙරෙහි ප්‍රතිචාර දැක්වූ සමහර නමක් නැති පාඨකයන් කීවේ මෙහෙමය.
1.Anonymous said...
සහෝදරයා අර්ධ පරිසර වේදියෙක් වගේ ගස්වලට විතරයි වගේ කරුණාවන්ත කම.අනාගතයේදී ඔබ මිනිසුන් වත් වර්ග කරලා තෝරාගත් අයට පමණක් ප්‍රතිකාර කරනවද ?අපි දන්නා විදිහට සැබෑ පරිසවේදියා ශාක හා සතුන්ට ආදරය කරුණාව දක්වන්නෙක්.කුසගින්නේ සිටින සතෙකුට කෑම ටිකක් නොදෙන ලෙස බ්ලොග් අඩවි වලින් පවා ප්‍රචාරය කරන ඔබ වැන්නෝ අනාගතය්දී මිනිසුන්ට කෙලෙස සලකවිදැයි සිතා ගත හැකිය. ඔබ කාඩ්බෝඩ් පරිසර වේදියෙකි.

2.Anonymous said...
පළමු ඇනෝවා වෙමි.සතුන් නිදැල්ලේ යැවීම,නිසිකලට එන්නත් නොදීම, කුඩා පැටවුන් තැන් තැන් වල අතරමන් කිරීම සම්බන්දව ඔබ කියා ඇති කරුණු සමග එකගවෙමි මගේ විරෝදය වුවේ බල්ලන්ට කෑම නොදී සිටීම සම්බන්දව ඔබ හිපොක්‍රටීස් දිව්රීම්ද සම්බන්ද කරගෙන කර ඇති ප්‍රකාශයටය.එය බෙහෙවින් අකාරුණික දෙයක් ලෙස සිතමි.ඒගැන මගේ මතය මෙයයි.ගල් යුගයේ ජීවත් වූ ඔබෙත් මගෙත් සහ අපි සැමගේම මී මුත්තන් විසින් බල්ලන් ගෘහ ආශ්‍රිත සතෙක් බවට පත් කරන ලදී.එදා සිට ඒ ගල් යුගයේ මිනිසාගේ ජීවිතය වෙනදට වඩා පහසු වෙන්නට ඇත.එසේම මිනිස් වර්ගයාගේ සීග්‍ර දියුණුව සහ ලොව පුරා මිනිස් වර්ගයාගේ පැතිරීමටද බල්ලාගේ දායකත්වය ලැබෙන්නට ඇත.මෙසේ වෙත්දී බල්ලාට උගේ සොභාවික පුරුදු අමතකව ගියේය.ප්‍රධාන වශයෙන්ම තමාගේ ආහාර දඩයමින් හෝ සපයා ගැනීමේ හැකියාව උගෙන් ඉවත් විය.අද අපි දකින්නේ මිනිසාගේ යහපත පිණිස තමාගේ සොභාවික හැකියාවන් ඉවත් කර ගත් බලු පරපුරේ වත්මන් සාමාජිකයන්ය.ඔවුනට තමන්ගේ වනගත සගයන්ට මෙන් තනිවම අහර සපයා ගත නොහැකිය.ඒ සදහා ඔවුනට මිනිසාගේ පිහිට පැතීම හැර අන් යමක් කල නොහැකිය.අතීතයේදී අපේ පුර්වගාමින්ට අමිල සේවයක් කල මේ සතුන්ට කරුණාව දයාව දැක්වීම අපට පැවරී ඇති වගකීමකි.ඔබ සිංහරාජ වනයේ ගස් ගෙම්බන් වඳව යාම ගැන සමනලුන් වඳව යාම ගැන කරදර වෙන බව දනිමි. එසේ නම් බල්ලන් වැඩිවීම සම්බන්දවද ඔබ කරදර වීම කුහක කමක් නොවේද?මොවුන් සියල්ලෝම සතුන් වෙති.තම වර්ගයා වැඩියෙන් ව්‍යාප්ත කිරීම ඔවුන්ගේ අරමුනයි.සැබෑ පරිසර වේදියෙකු නම් කල යුත්තේ සොභා දහමේ රිද්මය නොනසා එයට පවතින්නට ඉඩ හැරීමය.අවසන් වශෙයෙන් අකාරුනිකත්වයේ පාඩම ඉගැන්වූ ඔබගේ ගුරුවරයා පිළිබඳව කණගාටු වෙමි
මුලින්ම කිව යුත්තේ මම මේ ලිපිය ලිවීමේදී බරපතල අඩුපාඩුවක් කර ඇති බවය.
එනම් අපේ ගුරුතුමා අපට කීවේ අපේ පීඨයේ සිටින දඩාවතේ යන බල්ලන්ට කෑම දෙන්න එපා යැයි කියලා පමණි.
ඔහු අපට පාරේ හෝ ගෙදරට එන දඩාවතේ යන බල්ලන්ට කන්න දෙන්න එපා යැයි නොකීවේය.
මෙයට හිපොක්‍රටීස්ගේ ප්‍රතිඥාව ගාවා ගැනීමද මා කළ තවත් වරදකි.
එය යෙදුවේ අප කියූ දෙය මහා බරපතල දෙයක් නොවූවද එය ද වැදගත් නිසාය.
එනිසා ඇනෝවා කියූ දෙයෙහි යම් සාධාරණත්වයක් ඇත, මක් නිසාද යත් ඔහුට මා කීවේ දත්ත වලින් අඩක් පමණක් වන නිසාය.
මේ වූ අඩුපාඩුවට මගේ ගුරුවරයාගෙන් මට සමාව ලැබේවා.

පළමුව අපේ පීඨයේ බල්ලන්ගෙන් මිනිසුන්ට වන කරදර ගනිමු.
1.අපට වාඩි වීමට ඇති විවෘත ශාලාව බල්ලන් ඔවුන්ගේ මූලස්ථානය කරගෙන ඇත.
ඔවුන් එහි අප කෑම කන පාඩම් කරන මේස මතත්,
අප වාඩි වෙන පුටු වලත් නිදාගනී.
මොවුන් පිරිසිදු බල්ලන් නොවන බව තේරුම් ගන්න.
2.බල්ලන් මේ ස්ථානය ඇතුළු අනෙක් සියළු ස්ථාන වල සිටිමින් පොරකන විට එය මහත් කරදරයකි
ඔවුන් දේශන ශාලා අසල පොරකන විට අපට එය බාධාවකි.
3.බල්ලන් අනවසරයෙන් දේශන ශාලා වලට ඇතුල් වීමද කරදරයකි.
4.තවද වෙලාවකට ඔවුන් එලවන විට ඔවුන් තම අයිතිය පෙන්වීමට බිරීමද ගෙරවීමද කරන අතර,
එයින් පසුව ඔවුන් අපව හැපීමට ද ඉඩ ඇත.
5.බල්ලන් පමණක් නොව පූසන් නිසාද පණු රෝග, ජලභීතිකාව, දද කුෂ්ට වැනි බොහෝ රෝග ඇති විය හැක.
6.පිළිවෙලකට තිබිය යුතු වැදගත් දෙයක් සිද්ධ වන පරිසරයක මෙවන් අපිරිසිදු හොරි හැදුන පොරකන බල්ලන් සිටීම අශෝබනය.
ඔවුන්ගේ මළ මෙන්ම ඔවුන්ද පරිසරය අපවිත්‍ර කරයි. 


මේ නිසා මේ බල්ලන් අපගේ පීඨයෙන් ඉබේටම ඉවත් කිරීමට හැරීම අප සැමගේ වගකීමකි.
බල්ලන් මැරීම, ඔවුන්ට පහරදීම හෝ වෙනත් පීඩාවක් නොකර ඔවුන්ට ආහාර නොදී ඔවුන් විසින්ම අප පීඨය හැරයෑමට ඉඩ හැරීම ඉතා සුදුසුය.
මෙහි වරදක් නැත.
ඇත්තෙන්ම මෙය ඉතා සොබාසුමිතුරු සත්ත්ව - මිනිස් ගැටළු විසඳුමකි.
නමක් නැති පාඨකයාණනි..
මම ඔබේ අදහස් වලින් සමහරකට පමණක් එකඟ නොවෙමි.
එකඟ වෙන ඒව වැඩි නිසා එකඟ නොවෙන ටික පමනක් දමමි.


"සහෝදරයා අර්ධ පරිසර වේදියෙක් වගේ ගස්වලට විතරයි වගේ කරුණාවන්ත කම.අනාගතයේදී ඔබ මිනිසුන් වත් වර්ග කරලා තෝරාගත් අයට පමණක් ප්‍රතිකාර කරනවද ?
සතෙකුට කෑම ටිකක් නොදෙන ලෙස බ්ලොග් අඩවි වලින් පවා ප්‍රචාරය කරන ඔබ වැන්නෝ අනාගතය්දී මිනිසුන්ට කෙලෙස සලකවිදැයි සිතා ගත හැකිය. ඔබ කාඩ්බෝඩ් පරිසර වේදියෙකි.
ඔබ සිංහරාජ වනයේ ගස් ගෙම්බන් වඳව යාම ගැන සමනලුන් වඳව යාම ගැන කරදර වෙන බව දනිමි. එසේ නම් බල්ලන් වැඩිවීම සම්බන්දවද ඔබ කරදර වීම කුහක කමක් නොවේද?මොවුන් සියල්ලෝම සතුන් වෙති.තම වර්ගයා වැඩියෙන් ව්‍යාප්ත කිරීම ඔවුන්ගේ අරමුනයි.සැබෑ පරිසර වේදියෙකු නම් කල යුත්තේ සොභා දහමේ රිද්මය නොනසා එයට පවතින්නට ඉඩ හැරීමය.අවසන් වශෙයෙන් අකාරුනිකත්වයේ පාඩම ඉගැන්වූ ඔබගේ ගුරුවරයා පිළිබඳව කණගාටු වෙමි"


කෙසේ වුවද මේ අදහස දත්ත අඩු වීම නිසාම වූවකැයි මම සිතමි.
ඔබගෙ නිර්භය විවේචනය මම අගය කරමි.
ඔබ සම්බන්ධ වූ ලිවීම මම මෙයින් නවතමි.
ඔබට බොහොම ස්තූතියි.

මින් ඉදිරි ලිපියට ඔබ දැක්වූ යහපත් කරුණුද ප්‍රයෝජනයට ගනිමි.

මේ අදහස් ටික මා කලින්ම ලිවීමට සිටි දෙයකි.

ඔබ කී පරිදිම බහුතරයක්ම පාරිසරික ප්‍රශ්න ඇති වී ඇත්තේ මිනිසුන්ගේ ක්‍රියා නිසාය.

මේ සතුන්ට මිනිසුන් කර ඇත්තේ අපරාධයකි.

ඔවුන් ඇති කර ඔවුන් පැටවුන් දැමූ විට හන්දියක හෝ පන්සලක දමා යෑම කැත වැඩකි.

මේවා සියල්ල සමහර මිනිසුන්ගේ මෝඩ නැහැදුනු ක්‍රියා නිසා සිදුවේ.

මෙය නතර කිරීම මිනිසාගේ වගකීමකි.

බල්ලන් පමණක් නොව වෙනත් සතුන් ගැන කීමට ඇත්තේද එයමය.

දැන් බල්ලන්ට වූ අසාධාරණය පැත්තකින් තබමි.

මගේ අතේ මදුරුවෙක් කයි, ඌ ඩෙංගු රෝගය පතුරන එකෙක් බව මම හොඳින්ම දනිමි.

එහෙත් මම ඌ නොමරමි,

ඒ සතුන් මැරීම පවක් නිසාය.

එහෙත් මම "මොවුන් සියල්ලෝම සතුන් වෙති.තම වර්ගයා වැඩියෙන් ව්‍යාප්ත කිරීම ඔවුන්ගේ අරමුනයි.සැබෑ පරිසර වේදියෙකු නම් කල යුත්තේ සොභා දහමේ රිද්මය නොනසා එයට පවතින්නට ඉඩ හැරීමය."

යන මතයට මෙතැනදී විරුද්ධ වෙමි.

මදුරුවා ද සතෙකි ඌද  බෝවීමට කැමති නිසා අපි උට බෝ වීම පිණිස ගේ වටේට වතුර බාල්දි පුරවා තැබීම නොකළ යුතුය.

මදුරුවන් බෝවීමට ඉඩ ඇති දේ නිසි පරිදි බැහැර කිරීම මගින් මා මෙන් සතුන් මැරීම පවක් යැයි නොසිතන කෙනෙක්ට වුව අනාගතයේ මදුරුවෙක් තැලී පොඩි වෙන ලෙස පහර දීම හෝ මදුරු කීටයන් පිරි පොල් කටුවක් පෙරලා උන් ටික මැරීමට සිදු වීමෙන් වැලකිය හැක.

මදුරුවාද බඩගින්නේ සිටින සතෙකු යැයි කියා රෑට මදුරු දැලක් නැතුව නිදා ගැනීමද මට කළ නොහැක.

දැන් මදුරුවාගේ කතාවෙන් බලු කතාවට ගත හැකි සබැඳිය බලමු.

බල්ලාට ද කෑම දීම පිනකි.

එහෙත් උට කෑම දීමට සුදුසු තැන් ඇත.

ගෙදරට හෝ අප ඉන්න ආයතනයට ඔවුන්ගෙන් කරදර නම් එතැන කෑම දීම නුසුදුසුය.

එසේ නම් මහින්ද මාමා ගේ ගෙදර ද, ගල්කිස්ස මහ හෝටලයේ ද, අම්බුළුවාවේ රජගෙදර ද,තානාපති කාර්යාල වලද, ඉස්පිරිතාල වලද උන්ට කෑම දීම කිරීම කළ හැක,

එහෙත් එය නුසුදුසුය,

ඒ නිසා එය සිදු නොකරයි.

මේ ලෙස පරිසරට එරෙහිව සමහර දේවල් කිරීමට සිදු වේ,

සතුන් ගැන පමණක් නොව ගස් ගැන ද එසේය.

සමහර තැනක ගසක් කපා පාරක් හෝ පොදු යහපතක් වෙන දෙයක් සැදීම හෝ ගෙදරක් තැනීම කිරීමේ වරදක් නැත.

(එහෙත් ඒ ගස නොකපා පුළුවන් නම් හොඳය )

එහෙත් මම අපේ රටේ හයි වේ සෑදීම, නුවර එළියේ සහ නුවර ගුවන් තොටුපල සෑදීම, වැව් වලට ප්ලේන් බෑම ආදිය අනුමත නොකරමි.

ලිපිය ලිවීමට ගෙදර ආගමන් වෙලාව වැය කළ නිසා මට මහන්සිය ඒ නිසා මම මෙය කෙටියෙන් අවසන් කරමි.

පසුව යමක් ඇත්නම් යළි ලියමි.

කෙටියෙන් මට කීමට ඇත්තේ සියළු දේ නිසි අවබෝධයකින් කළ යුතු බවය.

පරිසරය ගැන ද එසේමය,

එසේ නොකළ විට වෙන්නේ පරිසර අන්තවාදීන් හෝ පරිසර පිස්සන් බිහි වීමය.

පරිසර හානි වලට විරුද්ධ වීම ද අවබෝධයෙන් පිළිවෙලට කළ යුතුය, නැත්නම් වෙන්නේ පහත  සිදුවීම වැනි ඒවා සිදු වීමය.

මම මීට වඩා විස්තර නොකරමි.

http://latimesblogs.latimes.com/gossip/2010/09/lady-gaga-meat-dress-made-of-real-meat.html

http://www.tonic.com/p/a-brief-history-of-naked-protests/

අන්තර්ජාලයේ මඳක් සොයා බලන්න මේ මම ගැසූ සෙවුම් පදය.

Lady Gaga Beef

Green Peace Naked

මෙවන් විකාර අපේ රටට තවම ඇවිත් නැත,

ඒ ගැන සතුටුය,

බඩතඩියෙකුගේ චීන පිළිම අවබෝධයකින් තොරව තබාගෙන ලොව අසාහය පුද්ගලයෙකුට ගරහා පවු පුරවාගන්න මිනිසුන් සිටින දහමින්ම පෝෂණය වූ රටක් වූ අප රටේ මෝඪ මිනිසුන්ට මෙවන් විකාරවත් හිතට නො ඒවා!

සොබාසුමිතුරු යෝජනා:

මම ද බල්ලා පමණක් නොව වෙනත් සතුන් පවා බඩගින්නේ සිටින විට කෑම දී ඇත්තෙමි.

එමෙන්ම මම ද සතුන්ට කෑම දීම ප්‍රිය කරමි.

ඒ නිසා මම ලේනුන්ට සහ කුරුල්ලන්ට බත් කන්න ලෑල්ලක් සාදා ඇත්තෙමි.

බල්ලන්ට පූසන්ට නම් ගෙදර කෑම දීමක් සිදු නොකරමි,

එහෙත් පාරකදී හෝ වෙන තැන් වල නම් දී ඇත.

මම කූඹියන්ට පවා කෑම දීම ප්‍රිය කරමි.

මම උන්ට කෑම කෑල්ලක් දී ඔවුන් එය උස්සාගෙන යන හැටි බලා සිටීමට ප්‍රිය කරමි.

ඔබලාත් එය කර බලන්න,

එය මහත් ආශ්වාදජනක දෙයකි.

අවසාන වශයෙන් ඇනෝවාට කිසි අපහාසය කෙරුමට නොසිතූ බවත් කිසි අමනාපයක් නැති බවත් ලියා තබමි.

Top Picture: Link


Speacial Comment:
Gimhani said...
වෙදනා සමග එකඟයි. ඔහුට කියන්න උවමනා කල දේ මමනම් අවබෝද කරගත්ත කලින් ලිපියෙන්ම. ඒත් විවේචන ඕන.. පරේ ගිය බලු පැටියෙකුට කන්න දෙන්න ගිහින් උන අනුවේදනීය කතාවක් මටත් තියෙනවා. එකම බලු පැටියට මාත් ඔහුත් කන්න දුන්න. ඒත් ඔහු අද ජීවතුන් අතර නැ .. රේබීස් රෝගයෙන් මිය ගියා.. මම කන්න දාලා දුවල එනව නිතරම . ඒත් ඔහුව හපල තියනව . පොඩි බලු පැටිය කියල ගනන් අරගෙන නැ. කාටවත් කියලත් නැ.

ඔබ නිදනා සීතල පොළවේ මලක් පිපීලා නමක් නැතී...

ජීවිතාරක්ෂක සේවකයින්ට තවත් මළසිරුරක් විතරයි ඒක.

ඒ  භූමිකම්පාවෙන් බොහෝ ජීවිත පස් අතරේ වැලලී ගියා.

එක් කාන්තා මළසිරුරක් අනිත්වාට වෙනස් ආකාරයට තිබුණා.

හරියට වන්දනා කරනවා වගේ දණින් වැටිලා.

ඒ ඉරියවුව හරි වෙනස්, ඔවුන් හිතුවා සමහර විට ඇය තවමත් පණපිටින් කියලා,

ඒත් බිත්තියේ තිබුන පටු විවරයෙන් අත දාල ඒත්  ස්පර්ශ කරපු සහන කණ්ඩායමේ නායකයාට සීතල වෙලා දරදඬු වුන ඒ සිරුරෙ ජීවයක් නැති බව තේරුනා.

ඇයගේ හිසට සහ කොන්දට හානි වෙලා තිබුණා.

ඔවුන් ඊළඟ ගෙදරට යන්න සූදානම් වුනේ හිරවෙලා තියන ජීවිත  බේරාගන්න එක වඩා වැදගත් නිසා.

ඒත් ඔහුට නොදන්නා වූ හැඟීමක් ආවා..

ඒ නැවතත් එතන පරික්ෂා කරන්න ඕන කියලා.

ඔහු ආපහු ඇවිත් ඇයගේ මළසිරුර ළඟ දණ ගහලා ඇයගේ සිරුර යටට අත දාලා බැලුවා.

"දරුවෙක්!!! මෙතන දරුවෙක් ඉන්නවා"

ඔහු පුදුමයෙන් කෑගැහුවා....

සියලුදෙනාම එකතු වෙලා වැඩ කරා.

ඔවුන් එතන තිබුණ කැඩුණ බිඳුණ කණු ඉවත් කරා හරිම ප්‍රවේශමෙන්.

අන්තිමට ඔවුන් දරුවාව ඉවතට ගත්තා, මාස තුනක් වයස පුංචි කොලු පැටියා තවමත් සාමකාමීව සැපට නිදි.

                                                                 බේරාගත්ත දරුවා.

සහන සේවකයො වහාම දරුවව වෛද්‍යයවරයාට යොමු කළා,

ඔහු පොඩි එකාව ඔතල තිබුණ මල් රෙදි කෑල්ල දිග ඇරියා.

ඔහුට හම්බුනා ෆෝන් එකක්,

" පුතේ උඹට ජීවිතේ බේරගන්න ලැබුණොත්, උඹ මතක තියාගන්න ඕන මං උඹට ආදරෙයි කියලා"

ඒ තරුණ අම්මා කෙනෙක්ගේ ජීවිතේ අන්තිම කෙටි පණිවිඩය.

ෆෝන් එක අතින් අතට ගියා,හැම කෙනාගෙම ඇස් තෙමුණා.

අම්මෙක් තමන්ගේ එකම දරුවට කොච්චර ආදරේද, මිහි මව කම්පා වෙලා තමන්ගේ ගෙදර කඩා වැටෙනකොට, දරුවව ආරක්ෂා කරන්න ඔහුව වහගත්තෙ තමන් ඒකෙන් මැරෙනවා කියලා දැනගෙන.

එහෙමයි අම්මෙක්ගෙ ආදරේ.

මේ ඡායාරූපයට 2009 මාර්තුවේදි චීනයේ අන්තර්ජාතික පුවත්පත් ඡායාරූප තරඟයේදි රන් සම්මානයක් හිමි වුනා.

ඒ මේක ගත්ත Zou Sen  ට.

ඔහු මෙය නම් කරල තිබුණා " භූමිකම්පාව අහර මවු සෙනෙහස" කියලා.

මගේ අම්ම මේක කියවන්නෙ නැති වෙයි,

ඒත් අම්මට මං ගොඩාක් ආදරෙයි!!! 

මට මේකට වෙන කිසි දෙයක් එකතු කරන්න ඕන නෑ,

ඔබම හිතන්න.

උපුටා ගත්තේ අන්තර්ජාලයෙන්

-----------------------------------------------------------------
මේ ෆේස්බුක් ගිණුම වහනකොට කොපි කරගත්ත මගෙ නෝට් එකක්.
මේ ෆොටෝ එක සහ කතාව ලෝකෙ ගොඩක් ප්‍රසිද්ධයි.

බහුතරය ඒක දැකල ඇති.

කමක් නෑ මමත් දානවා බ්ලොගයට .

මේ හෙඩිම ලංකාවේ දක්ෂ කවියෙකුගෙ නිර්මාණයක්.
""ඔබා දෙදණ නිල් උඳු පියලි බිම මත
වැන්දේය ඔහු බැති සිතින්
අම්මා වැළලූ තැන මහ පොළොවට"


ඔහු මහගම සේකර.
මේ කොටස උපුටාගත්තෙ එතුමා වෙනුවෙන් සැදුණ නිල බ්ලොග් අඩවියෙන්.
(කියවලම බලන්න මේ බ්ලොගය... දුක්මුසුම තැනකුත් තිබුණා.)

ඒ අනුසාරයෙන් ගීතයක් නිමැවුනා.
ඇත්තම කියන්න මම ඒ ගීතයෙත් වැඩියෙන්ම ආස කොටස 
"ඔබ නිදනා සීතල පොළවේ මලක් පිපීලා නමක් නැතී
ඔබා දණ බිම නැමී සිඹිනෙමි ඔබේ කිරි සුවඳයි අම්මේ"
මේක ගයන්නෙ අජිත් බණ්ඩාර.

ලීවෙ මහින්ද චන්ද්‍රසේකර සංගීතය මහේෂ දෙණිපිටියගේ.
ඒකත් පුදුමයි කවියේ සහ ගීතය යන දෙකම ලියල තියන්නෙ සේකරලා.
කොහොම වුනත් මේ කවිපෙළ සහ ගීතය යන දෙකම මගේ හිතට තදින්ම වැදුන එකක්.
මම මේ කවි පෙළ ඉස්සල්ලම දැක්කෙ ටි‍යුෂන් ක්ලාස් එකක පොතක.
මම ඒක දැකල ආයෙමත් හෙවුවා ගෙදර ඇවිත්.
පුදුම ලස්සනයි ඒක.

මට තව එකක් ලියන්න හිතුනා
ඒකත් ලියනවා...

ජෝතිපාල හොඳටම බීවා, මර්වින් පෙරේරත් බීවා,

ප්‍රේමකීර්තිත් බීවා,

මේ කලාකරුවො.

සමහර කලාකරුවෝ කියනවා "මධුවිත ගත්තම කලා සිතුවිලි පහල වෙනවා" කියලා.

මට නම් ඒක විස්වාස කොරන්ට බෑ.

පහළ වෙනව ඇති, ඒත් නිකං ඉන්නකොට ඊට වඩා පහල වෙන්න ඕන.

කොහොම වුනත් අපරාදෙ දක්ෂ මිනිස්සු නිකාන් බේබද්දෝ වෙනවා.

බීලම මැරිලත් යනවා සමහරු.

කලාකාරයෝ විතරක් නෙවේ සමහර ආචාර්ය මහාචාර්යවරුත් ඉන්නවා,

අපරාදෙ.

සුන්දර හග්ගල

වර්ණවත් මල් සුපිපුන මල් ගොමු දෙකකි, ඒ මැදින් සුන්දර අඩිපාරක් විහිදෙයි, මල් ගොමු හා පාර අතර හරිතවන් තණ පලසෙන් හෙබියේ වෙයි. පසෙකින් පෙනෙන  මිහිදුමින් වැසි කඳුවැටිය පිසගෙන එන සිසිල් මඳ නල ගත සිත පොබයමින් ඇදී යන්නීය.

අඩි පාර තුරු ගොමුවක් තුලින් විහිදී සුන්දර පෙදෙසකට ඇතුළු වෙයි,

එහි පර්ණාංග පිරී ඇත.

ගස් පර්ණාංග ලැගුම් ගත් කණ්ඩි ඇති සුන්දර පිවිතුරු සීතල දිය හෙමි හෙමින් ගලා යයි.

දිය පාරට උඩින් ආරුක්කු හැඩය ගත් කෙටි පාලමකි.
ඒ හරහා මීවන ගොමු මැදින් දිවෙන අඩි පාර දිවේ.

වතුරපාරේ හඬ සීතල නිසල පරිසරය හා මුහු වූ විට අතිශයින් සිත් නිවී යන පරිසරයක් බිහි වේ.

තැනින් තැන වූ ලී කොටන් මත වාඩි වී ඉසිඹු ලන විට ජිවිතය හරිම සැහැල්ලුය.

හිටිවනම හොඳින් හැඳගත් ජෝඩුවක් එතැනට පැමිණියහ,

සුන්දර යුවතිය අතේ වූ බිස්කට් පැකට්ටුවේ වූ අන්තිම එක සිය පෙම්වතාට කවා පැකට් එක විසි කළේ සුන්දර මල් පාත්තියටයි.

ඉන් පසු තණ බිස්සේ වාඩිගත් ඔවුන් ෆ්‍රයිඩ් රයිස් කෑවේ ඉතා සතුටිනි.

කෑමෙන් පසු එහි පෙට්ටිය සහ ඒවා රැගත් පොලිතින් මල්ල දමා ඔවුන් නැවතත් ඇවිද ගියෝය.

දිය පාරට උඩින් ගිය මෙවන්ම තවත් පිරිසක් දිය පාර අසල කෑම කා කෑම එකේ වූ ලන්ච් ෂීට් ටික දිය පාරට දමා අත ද එයින්ම සෝදාගෙන එතනටම වී කයියක් ගසා ගියෝය.

මුලින් කී යුවලගේ මිත්‍ර යුවල තමන්ගේ ආදරය මේ සුන්දර දිනය මතක නොවනු වස් සුන්දර ගසක හැකි උපරිම සුන්දර විදිහට ඔවුන්ගේ නම් කෙටූහ.

පසුගියදා මම විස්සවිද්දියාලයේ මිතුරන් සමග ගිය පළමු චාරිකාවෙන් නුවර එළියේ හග්ගල උද්භිද උද්‍යානය වෙත ගියෙමි.

මේ එහිදී මා දුටු සමහර දේවල් වලින් උත්තේජනය වී ලියන ලිපියකි.

මේ මා නිරීක්ෂණය කළ දෙයක් නොවේ,

එහෙත්මෙය නොවිය හැක්කක් නොවන බව මා හොඳාකාරවම දනිමි,

මක් නිසාද යත් මම පේරාදෙණිය රාජකීය උද්භිද උද්‍යානය වසර 7ක් පමණ දිගු කලක් ඇසුරු කළ නිසාය.

ඇත්තෙන්ම මට හිතෙන හැටියට අපේ රටේ සමහරක් මිනිස්සුන්ට ආචාර ධර්ම කියන ජාතිය හරිම ආගන්තුකය.

දෙයක සුන්දරත්වය රසවිඳ අඩු ගානේ එය විනාස නොකර සිටීමටවත් හිත හදා ගැනීමට ඔවුන්ට නොහැක.

මට නම් මේ මිනිසුන්ගේ සිතේ සොබාවය වටහාගැනීම අපහසුය.

මේ තරම් සුන්දර තැනක් කැත කිරීමට මනුස්සයෙක්ගේ හිත යොමු වෙන්නේ කෙසේද?

මෙතන ඇත්තේ හුදෙක්ම කැත ගතියකි.

පොලිතීන් පමණක් නොව දිරාපත් වෙන දෙයක් හෝ සුන්දර පරිසරයකට ආගන්තුක ලෙස දැමූ විට එය කැතය.

උදාහරණයකට ලස්සනට පිළිවෙලට පවත්වාගෙන යන තණබිස්සකට ඔබ කෑ අඹ ගෙඩියක ඇටය දැමුවොත් හෝ එයට කෙල ගැසුවොත් එය සුන්දර දෙයක් නොවේ.

දිරා යන දෙයද බැහැර කරන නිසි පිළිවෙලක් ඇත,

නිසි තැනක් ඇත.

ලවු කිරීමට, පවුලේ උදවිය සමග ඇවිදීමට හෝ මිතුරන් සමග ඇවිදීමට මෙවන් තැනකට යාමේ කිසිදු වරදක් නොමැත.

මේ තැන් වලට ගිහින් කෑමේද වරදක් නැත.

එහෙත් මේ වගේ කැත වැඩ කිරීම වැරදිය.

මේ දේවල් වෙනවා ඔබ දුටුවහොත් එසේ කරන කෙනාට එය පහදා දෙන්න.

එය අසන්නේ නැත්නම් එහි ආරක්ෂක අංශයට දැණුම් දෙන්න.

මේ දේවල් තව තවත් වැඩි වෙන්නේ මෙවන් වැරදි වලට කටපියාගෙන සිටින නිසාය.

ඒ නිසා හැකි සෑම විටම මෙවන් දේවලට එරෙහි වන්න...

ඔබද ආදර්ශමත් වෙන්න,

උදාහරණයකට ඔබ නුවර එළියට ගොස් කෑම පර්සලයක් ගත් විට එය බහා දෙන පොලිතින් මල්ල ළඟ තබාගන්න,

කරන්නට වෙන දෙයක් නැති නිසා කෑම කා ලන්ච් ෂීට් එක කසල බඳුනකට දමන්න.

ඉන් පසුව ඔබ රෝස පැල දෙකක් ගත්තේ යැයි සිතන්න.

ඔබට සිලි බෑග් දෙකක් අවශ්‍යය, එහෙත් ඔබ සතුව දැනටමත් එකක් ඇත.

එහෙයින් ඔබට අළුතින් ගැනීමට වන්නේ එකක් පමණි.

මේ අයුරින් බලන කල ඔබ කළ ඒ පොඩි දෙයින් ඔබගේ පොලිතීන් භාවිතය 50%කින් අඩු වී ඇත.

ඔබ සමග යන මිතුරන් පස් දෙනෙකු වේ යැයි සිතන්න.

ඔවුන් පස් දෙනාද ඔබගේ කීම අසා එකඟ වී මේ දෙයම කළහොත්?

ඔබත් ඇතුළුව හය දෙනෙකු පොලිතින් මළු හයක් භාවිතා වීම වලකා ඇත.

ඔබගේ මිතුරන් පස් දෙනාත් මෙසේ කළහොත්?

සිතා බලන්න අපිට වෙනසක් කළ නොහැකිමද?

හැකි තරම් මේ පණිවිඩය මිතුරන් අතර බෙදා ගන්න.

ෆේස්බුක් ඇත්තේ ඔබ කැමති සිංදු,විහිළු කතා, පින්තූර බෙදා ගැනුමට පමණක් නොවේ,

මෙවන් පණිවිඩ ද ඔබේ මිතුරන් අතරේ බෙදා හදා ගන්න.

රටේ ලොකු ලොකු අය වැරදි කරන විට අපි මේ කරන චූටි ඒවා මොනවද?

කොහෙදැම්මත් ඕවා දිරන්නෙ නෑනෙ,

කියා සිතුවොත් මේ රට කිසිදා වෙනස් වෙන්නේ නැත.

ටික ටික හරි මේ දේවල් අපේ ජීවිත වලට බද්ධ කරගත්තොත් යම් දිනෙක බොහෝ දෙනෙකුට මේ පරිසරය රැකගත යුතු බවත්, මේ මේ වැරදි වන බවත් බඩු මිල පමණක් නොව ඒවාද අපි සිතනවාට වඩා වැදගත් බවත් තේරෙණු ඇත.

එවිට මිනිසුන් යම් දිනෙක් ඒ දේවල් ඉල්ලා හඬ නගනු ඇත.

එවිට වඩාත් සුන්දර හෙට දවසක් උදා වේවි.
මීළඟට
"I Do NOT feed STRAY DOGS X 7"
 බලාපොරොත්තු වන්න

තිරයෙන් පිටුපස කතා:
මට මේ දවස් වල පට්ට ලෙසම එපා වී ඇත්තේ කැමරාවක් නැතිකමිනි.
මම වෙබ් එකෙන් ෆොටෝ ගෙන පෝස්ට් වලට දැමීමට කැමති නැත්තේ වෙමි.
යාළුවන්ගේ සහ මගේ පැරණි ෆොටෝ භාවිතා කර මේ ලිපිය සැදුවෙමි.
එහෙත් කපල් එකක් සොයාගත් නොහැකි නිසා වෙබ් එකෙන් එකක් දැම්මෙමි.
හග්ගල ගියද මට අවශ්‍යය සමහර ෆොටෝ ගත නොහැකි විය,
මේ කතාවට අවැසි කැත වැඩ වල ෆොටෝ එසේ ගැනීමට නොහැකිව මිස්
වූ ඒවාය.
එහෙයින් මෙතන තිබෙන ෆොටෝ බහුතරයක් හග්ගල ඒවා නොවන බව කරුණාවෙන් සලකන්න.
ඉක්මනින් කැමක් ගත යුතුය.
තවද මේ සියල්ල පෙම්වතුන් කරන වැරදි ලෙස දැක්වීමට නොව කතාවේ ගලායෑම පිණිස පෙම්වතුන් දෙදෙනෙක් යොදාගත් බව කිව යුතුය.

හා ගිම්හානි අක්කා:
මගේ ඊමේල් එක
gloriosa90@gmail.com


Lovers Download Location:

පර්ණාංග = Ferns  ගස් පර්ණාංග = Tree Ferns.

ලංකාවේ ඇති සියළු ගස් පර්ණාංග "Cyathea" යන ගණයට අයත්වන අතර,විශේෂ 7 ක් පමණ ලංකාවෙන් වාර්තා වේ.
(කියවන්න මේ ලිපිය)

ලෝකයේ ඇති එකම සරල පත්‍ර දරන ගස් පර්ණාංගය වන

Cyathea sinuata එයින් විශේෂය.

මෙය කන්නෙලිය ප්‍රදේශයේ හමු වේ.

සාමාන්‍යයෙන් සුළබම ගස් පර්ණාංගය Cyathea walkerae ය මෙය මහ ගිනිහොට ලෙස ද හඳුන්වයි.

මෙය සෑහෙන තරම් ලොකුවට එනම් 2-2.5m පමණ උසට වර්ධනය වේ,

එසේම C.crinita ද නුවරඑළියේ සැලකිය යුත් ලෙස ඇත.

හග්ගල  පර්ණාංග උයනේ C.crinita සහC.walkerae යන දෙක පරිබාහිර සංරක්ෂණයට ලක් කර ඇත.

මාගේ දැනුමට අනුව මේවා ආයුර්වේදයේ භාවිතා වේ.

එසේම විසිතුරු ශාකයක් ලෙස ද ඕකිඩ් වගාවට ධාරකයක් ලෙස මෙහි කඳ ද භාවිතා කරයි.

මා මෙය සැකසීමට දැනුම යාවත්කාලීන කිරීමට අන්තර්ජාලය පිරික්සන විට සතුටුදායක දෙයක් හමු විය.

එනම් ආචාර්ය රනිල් රාජපක්ෂ මහතා විසින් Cyathea srilankansis ලෙස නව ගස් පර්ණාංගයක් ලංකාවෙන් හඳුනාගෙන ඇති බවය.

එවිට එයත් සමඟ ලංකාවේ මුළු ගස් පර්නාංග විශේෂ ගණන 8 දක්වාද ආවේණික ගණන 6 දක්වාද ඉහල නගී.

ගස් පර්ණාංග ලෝකයේ දැන් රජයන මල්පිපෙන ශාක වලට වඩා පරිණාමයෙන් පහළය.

එහෙත් මීට වසර ලක්ෂ ගණනකට මිලියන ගණනකට පෙර ලෝකයේ රජ කළේ මෙම ශාකයි.

මේවා ඒ කාලයේ පැවති ලෙසම දැනුදු පවතින් හෙයින් සජීවී පොසිල (Living Fossils) ලෙස හඳුන්වයි. 

තොරතුරු ගත් ලිපි

1.Conservation Priorities for Tree Ferns (Cyatheaceae) in Sri Lanka

2.Variationof Three Co-occurring Taxa of the Genus Cyathea in Singharaja and Kanneliya Lowland Rain Forests of Sri Lanka

විශේෂ ස්තූතිය
නාමල් සොහොයුරාට සහ තිසර සොහොයුරාට

පුංචි අම්මාගෙන් පුතාට...

දළදා සමිඳු පිහිටයි!
සෙනෙහෙබර පුතණුවනි..


ලෝ දම්හි මිහිතලේ - පිපුණු මල් කැකුළු පුත
දෙමවුපිය සෙනෙහසින් - විකසිතවු සුවඳ පුත
දසත සුවඳවත් වමින් - ළඳු කැලෑ මැදින් පුත
සම සිතින් බලා නෙත් - නමුව මත සැලෙයි ඔබ


මවුපියන් ගුරුවරුන් - ඥාතින්ද මිතුරු කැල
සනසමින් පෙන්වුවා - ඔබගෙ සිඵල රැඟුම්
විශිෂ්ටයි විස්මිතයි - එවන් යුග පුරුෂයින්
දෙනු මැනවි රැකවරණ - තුරුණුවන් ගුණ බෙලෙන්


සකල ලෝ සතු හැම වැටිලා දුක් සාගරේ
හදිසි අනතුරු මෙන්ම - විපත් බහුලයි ලොවේ
ලෙඩ රෝග - විෂ බීජ - මරු තුරුලෙ සැඟවිලා
දිගු කළා දෑත් යුග - රැකවරණ දෙවු ලොවට


දෙවු ලොවින් - මිහිතලය සිප ගත්ත පුතෙකු ලෙස
දෙන්න ඔබ නුවන් ඇස - සරස්වති දෙවු වරම
දෙනෝ දහ්සක් දෙනා බලා සිටි පෙර මඟට
නෙතු කඳුළු පිසදලා - පිහිට වනු මැණ සෙසුම


සසර හරි බියකරුයි - තෙරේක් නොපෙනෙන ලොවේ
දහම් රස දන්න ඔබ මටත් වැඩි පින්බරයි
රටට ජාතිය මෙන්ම ආගමත් රැකගන්න
එකම දම් සභාවේ - සසර මඟ සැනසෙන්න
දේ(විකා ) පුංචි



ලියන්නෙ නෑ කීවට අද මගේ පුංචි මට ලියන්න දෙයක් දීලා ගියා.
ඒක කාටවත් පෙන්නන්න එපා කීවා...
ඒත් මට විශ්වාසයි මේක අපෙ පවුලෙ කවුරුත්ම බලන්නෙ නෑ කියලා.
ඒ නිසා මම මේක පල කරනවා.
පුංචිට ගොඩක් පිං.
මේ ඉන්නේ අපෙ අත්තම්ම (මියගිය ),
ඇයව වසර ගණනාවක් තිස්සෙ ආදරෙන් බලාගත්තෙ පුංචි.
පුංචි උදේම නැගිටපු ගමන් අත්තම්මගෙ කකුල් දෙක අල්ලලා වඳිනවලු.
පුංචි දුප්පත් අහිංසක කෙනෙක්.
ඒත් මම ඔවුන්ගේ ගෙදර, ඒ කියන්නෙ අපෙ අම්මලාගෙ මහ ගෙදර ගියේ නෑ ළඟදි.
ඒකට සාධාරණ හේතුවක් තිබුනා.
ඒත් මම හිතුවා කීප වරක්ම ආය එහෙ යන්න ඕන කියලා.
ජීවිතේ හරි කෙටියි, මිනිස්සු වැරදි කරත් සමාව දෙන්න ඕන.
ඒ නිසා මං එහෙ යනවා දවසක.
අද ඉදලා ටික දවසක් විවේක ගන්න ඕන.

දුකෙන් ලියමි..

මගේ බ්ලොගය ටික කලකට නොලියා සිටීමට තීරණය කළෙමි.
එයට පෞද්ගලික ප්‍රශ්න හේතු විය.
කෙටි දැනුම්දීමකින් මෙය කරන්නේ දැණුම් දිය යුතු නිසාය.
පසුගිය කාලය තුල මට බ්ලොගය කිරීමට නොයෙක් උපකාර කළ සියළු දෙනාට මගේ ප්‍රණාමය.
මා මේ කල දෙයින් යම් ඵලයක් වුනාදැයි මම නිශ්චිතව නොදනිමි.
එය දන්නේ ඔබයි.
නිරතුරුව සොබා සුමිතුරු වීමටත්, අන් අයත් එයට යොමු කිරීමටත් උත්සාහ කරන්න.
මම නැවත හැකි වූ විට ලිවීමට යත්නදරමි.
කරුණාකර මගෙන් මෙයට හේතුව නොඅසන්න.
ස්තූතියි.
ඔබ සියළු දෙනාටම සොබා සුමිතුරු නව සොබා සුමිතුරන් බිහිකරන්නට හැකියාව ලැබේවා,
මීට 
ගෝඩෝනියා සිලැනිකා